Mat 5 | KYG | STEP | Asole vaya'mo ete ete hu'nageno Yesu'a apaketeno'ae'mo avefi'mo haino itopale mai'nige'apae'mo ge'amo ne'afiya vaya'mo agaetegamo e'a ali'a anupa hu'a mai'nageno'ae'mo

Matthew 5

1 Asole vaya'mo ete ete hu'nageno Yesu'a apaketeno'ae'mo avefi'mo haino itopale mai'nige'apae'mo ge'amo ne'afiya vaya'mo agaetegamo e'a ali'a anupa hu'a mai'nageno'ae'mo 2 aepa faino alino apaya male'niye.

Alagepa hu'a ne'maiya vaya'aife'mo apava gemo hu'niya gemae

(Luk 6:20-23)

3 Hapa paino'ae'mo, launelametefe'mo kagemi yatimo ageta o'male'nona vaya'mo mai'none, hu'a apakesa ne'afisaya vaya'mogimo Goti'a yagaino ne'apateya kegi'yafi'mo hai'a mai'nageno muki ya'amo apakai'api ya'mo hane'niya'mofe'mo Goti aulagale'mo alagepa hu'a mai'nayanage'a afa'a apamogaga aigae. 4 Goti'a yulagefa ne'aiya vaya'ai apaipamo alino falu huno apategaiya'mofe'mo aulagale'mo alagepa hu'a mai'nayanage'a afa'a apamogaga aigae. 5 Himu'namu kava'mo osu'a yagu yaga kava'mo hu'a ne'maiya vaya'mogimo muki afo'apimogi ya'mo mafa'ne'apimogimo ne'aliya kava hu'a muki ma mopamo aligaya'mofe'mo Goti aulagale'mo alagepa hu'a mai'nayanage'a afa'a apamogaga aigae. 6 Goti fatago kava'ae'mo apaka neteya vaya'mo alino apamisige'a ne'a apamu hugaya'mofe'mo Goti aulagale'mo alagepa hu'a mai'nayanage'a afa'a apamogaga aigae. 7 Goti'a alu vaya'aife'mo hapau hu'a apatete'a hapa ne'maya vaya'aife'mo hau huno apateteno hapa maegaiya'mofe'mo Goti aulagale'mo alagepa hu'a mai'nayanage'a afa'a apamogaga aigae. 8 Yaveyave apaipa vaya'mogi Goti'mo afa'a agegaya'mofe'mo aulagale'mo alagepa hu'a mai'nayanage'a afa'a apamogaga aigae. 9 Goti'a ali'a nanu ae'a ne'apataya vaya'aife'mo hapa paino'ae'mo, mafa'ne'nimo mai'nae, huno hapa paigiya'mofe'mo aulagale'mo alagepa hu'a mai'nayanage'a afa'a apamogaga aigae. 10 Fatago kava'apilefe'mo apaini hu'a ne'apatage'a mai'naya vaya'mogimo Goti'a yagaino ne'apateya kegi'yafi'mo hai'a mai'nageno muki ya'amo apakai'api ya'mo hane'niya'mofe'mo Goti aulagale'mo alagepa hu'a mai'nayanage'a afa'a apamogaga aigae. 11 Nagaetefe'mo hu'a faipa hu'a lapatege apaini hu'a lapatege lapakaefe'mo aigofe gemo hu'apae'mo, ani hosu kava'mo nehae, ina hosu kava'mo nehae, hu'a nehisayana Goti aulagale'mo alagepa hutapa mai'nayanagetapa afa'a lapamogaga aigae. 12 Alopa miyatapimo koku'napi'mo lapate'niya miyatapimo aligaya'mofe'mo lapaipafi'mo alagepa hutapa lapamogaga aiyo. Apakaemo hogote'a ani agufa kava'mo hu'a mai'naya vaya'mogimo Gotitegati gemo alini e'a ae'a hakalo hu'a hapa nepaiya vaya'aife'mo apaini hu'a apate'naya'mofe'mo lapamogaga aiyo.

Hagegana hutapa maige ha le yakana hutapa maige hu'naya vaya'mogitapae'mo hu'niya gemae

(Mak 9:50; Luk 14:34-35)

13 Lapakaemo ma mopafi vaya'ai hage'apigana hutapa mai'nae. Mai'naya'monanafa hagemo'mo haga nehiya ya'amo hano hisiyana haiya kava huno halate haga nehiya ya'amo alino hamalegaiye. Ali'ya'amo ohanegaiya'mofe'mo ali'a yaga au'a atale'nage'a ani hagele'mo apaiyaleti'mo ae'a umenitata nehae.

14 Lapakaemo ma mopafi vaya'ai ha le ya'apigana hutapa mai'nae. Mago taonimo avefi'mo ki male'nisaya taonimo'mo fala kino ohanegaifa afole yate'mo hane'nisige'a agegae. 15 Vaya'mogimo lamufi'mo kani ae'a kaete'apae'mo paketimo afe'alumelaga no'malafa hi'yalamuteke'mo malenageno muki ani nopi'mo mai'naya vaya'mo alagepa huno aeno ha leno ne'apatege'a age'a ha le'a ne'maiye. 16 Ani kava hutapa vaya'ai apaulagale'mo kanitapimo aetapa ha lege'apao alagepa kavatapimo agete'apae'mo koku'napi afotapimo agi'ale'mo ali'a asaga hu'a ateyo.

Ke'aepa ge'ae'mo ava gemo hu'niya gemae

17 Lapakaemo nagaefe'mo, agaemo Mosese ke'aepa ge'e Gotitegati gemo alini e'a ae'a hakalo hu'a hapa nepaiya vaya'ai ge'api'e'mo alino atalesiyafe'mo e'niye, hutapa lapakesa o'afiyo. Ali'na atalesuvafe'mo o'me'nofa ali'na afole ai'na atesuvafeke'mo e'nove. 18 Lama ge lapa nepauve, huno, Ke'aepa gemo'mo aise ya'atomogi alagena ya'mo magoke ya'atomogi huno alagi hano osuno afa'a haneme haneme ne'visigeno koku'na'e mopa'e'mo hano hugiye. Hogoteno muki ke'aepa ge'amo afole aite afole aite huno afole aino hano hugiye. 19 Inagi mago ne'mo'a henaga ke'aepa gefati'mo mago aise gemo amagino ataleteno vaya'mogi amagi'a atalesayafe'mo alino apaya malesiyana Goti'a yagaino ne'apateya kote'mo ina agufa ne'mo maigiye. Maigiya'monanafa mago ne'mo'a ke'aepa gemo akame nehuno'ae'mo vaya'mogi akame hisayafe'mo alino apaya male'nisiyana Goti'a yagaino ne'apateya kote'mo ala ne'mo maigiye. 20 Nagaemo lapa pai'nae'mo, fatago kavatapimo'mo ke'aepa gemo avo'mo kae'a ali'a apaya ne'malaya vaya'ai fatago kava'api'e Falasi mono vaya'ai fatago kava'api'e'mo alagi aeno o'agasesiyana Goti'a yagaino ne'apateya kote'mo faletutapa ohaigae, huno hapa pai'niye.

Apaipamo neleya kavafe'mo ava gemo hu'niya gemae

(Luk 12:57-59)

21 Akeya'vilaga vaya'mogimo hu'apae'mo,Vaya'mo kamiti o'apamagiyo. Mago ne'mo'a mago vekamo kamiti amagisige'apae'mo agoti hu'a ategae, hu'a hu'nagetapa ago afi'nae. 22 Afi'naya'monanafa nagaemo hu'nae'mo, mago ne'mo'a agaetegamo hosu kava'mo osu'nisiya konaga'amofe'mo aipamo leno atesiyana agoti huno ategaiye. Mago ne'mo'a konaga'amofe'mo, nagi'naga vekae, huno hu'nisiyana kanisole vaya'aitegamo avalelino uno alino he tino ategaiye. Mago ne'mo'a konaga'amofe'mo, faipa nagi'naga vekae, huno hu'nisiyana ata kopi'mo u'a nelamiya kate'mo ne'viye.

23 Ani gemo hane'niya'mofe'mo Goti'mo ofalinimo amisanafe'mo hi'yalamute'mo male'nekae'mo, konaga'nimo'a nagaefe'mo hosu aipamo kalino ne'nate, huka kagesa ne'afisanana 24 ofalini hi'yalamuteti'mo ataleka uka hogoteka alika kao ya'mo hutetana magoke lanaipa lanakesamo alitetana atagi negeka eka ofalinimo amiyo. 25 Mago ne'mo'a, agoti hu'na kategesuve, huno hisigekae'mo malage huka alika alagepa huka alika fako huka ato. Agotile'mo kavalelino o'u'nisigekaeke'mo kategamo ne'utanae'mo malage huka alika alagepa huka ato. Fiku yanageno kavalelino uno alino fako huno ne'apateya ne'mo ayapi'mo katesigeno alino fako huno ne'apateya ne'mo'a kavalelino uno ati vekamo ayapi'mo katesigeno ati vekamo'a alino kalavusi huno kategaiye. 26 Lama ge kaha nepauve, huno, anonakalefe'mo alagi maleka hano osisana'mo'mo afa'a ataleka o'ugane.

Kumai kavafe'mo ava gemo hu'niya gemae

27 Mago vaya'mogimo,Kumai kava'mo osiyo, hu'a hu'nagetapa ago afi'nae. 28 Mani gemo ago hu'naya'monanafa hemenimo nagaemo lapa pai'nae'mo, Mago vekamo'a a kanomo ageteno'ae'mo ha'ye nehisiyana aipafi'mo ani a kano'e'mo kumai kava'mo hu'niye. 29 Lamaga lapaulagamo'mo lapayate ali'nisigetapa hosu kava'mo nehisayana alita katitapa ataleyo. Lapakufafati'mo magoke yatapimo alitapa atalesayana ata kopi'mo o'visayana kanale hugiya'monanafa hosu kava'mo nehisageno muki lapakufa'a'e'mo alino ata kopi'mo yaga auno lapatalesigeno'ae'mo hosugiye. 30 Lamaga lapaya'mo'a lapayate ali'nisigetapa hosu kava'mo nehisayana heta hatagautapa ataleyo. Lapakufafati'mo magoke yatapimo alitapa atalesayana ata kopi'mo o'visayana kanale hugiya'monanafa hosu kava'mo nehisageno muki lapakufa'a'e'mo alino ata kopi'mo yaga auno lapatalesigeno'ae'mo hosugiye.

31 Akeya'vilaga vaya'mogimo,Mago vekamo'a a'amo ha faino atalesiyafe'mo huno'ae'mo hapa fai'a ne'apatalaya avo'mo kaeno amiteno hafaino ataleno, hu'a hu'nae. 32 Mani gemo hu'naya'monanafa hemenimo nagaemo hu'nae'mo, mago vekamo'a a'amo'mo kumai kava'mo osu'nisiya a kanomo ha faino atale'nisiyana kumai kava'mo hisiyafeke'mo ha faino atalegaiye. Ani kava huno mago ne'mo'a ha faino atale'nisiya a'mo ali'nisiyana kumai kavake'mo nehiye.

Gotitegati'mo alagi lama gemo nehuve, hutapa osiyo, huno hu'niya gemae

33 Akeya'vilaga vaya'mogimo mago'e gemo hu'apae'mo, Gotitegati'mo alagi lama gemo nehuve, hutapa hisaya gemo amagitapa o'ataletapa alagi akame hiyo, hu'a hu'nagetapa ago afi'nae. 34 Mani gemo hu'naya'monanafa hemenimo nagaemo lapa pai'nae'mo, Gotitegati'mo alagi lama gemo nehuve, hutapa osiyo. Koku'napi'mo Goti'a fai mai'neno yagaino ne'apateya aimu'yamo hane'niya'mofe'mo muga anaga koku'nategati'mo alagi lama gemo nehuve, hutapa osiyo. 35 Ma mopafi'mo Goti'a aiyamo aeno ne'maiya mopamo hane'niya'mofe'mo ma mopaleti'mo alagi lama gemo nehuve, hutapa osiyo. Yulusalemu taonimo hogote kini ne'mo taoni'amo hane'niya'mofe'mo Yulusalemu taonifati'mo alagi lama gemo nehuve, hutapa osiyo. 36 Lapakaemo anupa lapayokapati'mo magoke lui lapayokamo afa'a alitapa afole aitapa o'atege kalono lapayokapati'mo magoke anupa lapayokamo afa'a alitapa afole aitapa o'atege hugaya'mofe'mo lapanileti'mo alagi lama gemo nehuve, hutapa osiyo. 37 He, nehutapae'mo he'ageke'mo hiyo. Ha'ao, nehutapae'mo ha'ao'ageke'mo hiyo. Mago'e hutapa hosu agufa gemo nehaya gemo alagi hosu netegati'mo ne'e.

Hosu kava'mo anonatapile'mo mago'e hutapa halate hosu kava'mo osiyo, huno hu'niya gemae

(Luk 6:29-30)

38 Akeya'vilaga vaya'mogimo,Mago ne'mo'a kaulagamo aino apalo atisigekae'mo ani kava huka agae aulagamo aika apalo atiyo. Kave'mo aino atafaisigekae'mo ani kava huka agae ave'mo aika atafaiyo, hu'a hu'nagetapa ago afi'nae. 39 Mani gemo hu'naya'monanafa hemenimo nagaemo lapa pai'nae'mo, Lapakaetegamo hosu kava'mo hisagetapae'mo afa'a maiyo. Mago ne'mo'a lapakalametale'mo lapamagisigetapae'mo magokayaga lapakalametamo aita afe letapa amigeno lapamagino. 40 Mago ne'mo'a siotitapimo alisiyafe'mo huno'ae'mo, agoti hu'na lapategesuve, huno hisigetapae'mo alapa saketitapi'e'mo asagitapa amiyo. 41 Mago gamani ne'mo'a huno'ae'mo, ku'nile'mo naha maeta alitapa kofilitutapa mago afafale'mo nateyo, huno hisigetapae'mo ku'amo ha maetapa alita kofilita utapa atetetapae'mo halate mago'e hutapa alitapa kofilita utapa mega afagi'ale'mo ateyo. 42 Mago ne'mo'a huno'ae'mo, mago ya'mo namiyo, huno lapafi gesigetapae'mo afa amiyo. Mago ne'mo'a mago yafe'mo huno'ae'mo, yoka namiyo, huno lapafi gesigetapae'mo lapakame'ya o'amitapa afa amiyo.

Kame vayatapie'mo lapau lapayamopafi'mo lapaino, huno hu'niya gemae

(Luk 6:27-28,32-36)

43 Akeya'vilaga vaya'mogimo hu'apae'mo, lapaopale'mo mai'naya vaya'aife'mo lapau lapayamopafi'mo lapau'ninagetapa kame vayatapie'mo olapau'ninagetapa lapaini hutapa apateyo, hu'a lapa pai'nagetapa ago afi'nae. 44 Lapa pai'naya'monanafa hemenimo nagaemo, kame vayatapie'mo lapau lapayamopafi'mo lapaino. Hu'a faipa hu'a lapatesaya vaya'aife'mo, Goti'a lapa maeno, hutapa hapa paiyo. Lapakaefe'mo alagi ohapau'nisiya vaya'aitegamo alagepa kava'mo hiyo. Lapakaetegamo hosu kava'mo hute'a apaini hu'a nelapatesaya vaya'aife'mo nunumu hutapa apateyo. 45 Lapakaemo koku'napi Afotapimokana hutapa maisayafe'mo ani agufa kava'mo hiyo. Agaemo hosu vaya'aitega'e alagepa vaya'aitega'efe'mo, yegemo lo, huno nehigeno'ae'mo apakaete'mo yegemo nele. Agaemo fatago kava'mo nehaya vaya'aitega'e fatago kava'mo nosaya vaya'aitega'efe'mo ko'mo aiyo, huno nehigeno'ae'mo apakaete'mo ko'mo ne'aiye. 46 Apakaemo lapakaefe'mo hapau apayamopafi'mo nehapausiya vaya'aifeke'mo lapau lapayamopafi'mo nelapausiyana na agufa miyatapimo aligae. Takesi moni ne'aliya vaya'mogimo ani agufa kava'mo nehae. 47 Konagatapieke'mo ge apamamaetapa alitapa falu fala hutapa apatetetapae'mo haiya kava higetapa mago vaya'mo aetapa ne'apakasae. Ha'ao, malaga vaya'mogimo ani agufa kava'mo nehae. 48 Koku'napi Afotapimo'a alagepa kava'age'mo nehiya kava hutapa alagepa kava'age'mo hutapa maiyo, huno hapa pai'niye.